痱滋可大可小

病徵牙肉持續潰瘍斷症口腔癌

八十一歲的劉婆婆，說起去年七、八月因牙肉潰瘍而引發的連串噩夢，至今猶有餘悸，「當時我感覺到左下大牙嘅牙肉損咗，但唔係十分痛，又無流血，我以為係擦牙時唔小心整損，又或者係熱氣生痱滋啫，咪無理佢囉。」

一個多月後情況依舊，劉婆婆又聯想到可能是蛀牙，於是找牙醫檢查，詎料換來一個噩耗，「牙醫話我個傷口有啲唔妥，可能係癌！聽見個『癌』字，我啲眼淚就唔停咁流，你知嘛，我上年三月先做完大腸癌手術，仲孭緊造口袋，嗰刻我真係接受唔到又輪到個口生癌。」

去年患上口腔癌的劉婆婆，由於左臉腮位接受過皮瓣移植手術，所以仍有輕微腫脹，估計要再等半年才完全正常，亦因此影響她進食速度較慢，也不能吃太硬的食物。

身患兩癌吸煙是主因

不過，劉婆婆的眼淚也不能改變事實，經耳鼻喉科專科醫生抽組織化驗後，確診她患上口腔癌。至今仍滿腦子疑問的劉婆婆說︰「其實我懷疑係大腸嘅癌細胞走咗去個口，但醫生又話唔係，仲話我食煙先係最大原因。」

可幸劉婆婆的口腔癌屬於初期，並沒有擴散，手術後毋須接受電療，但飲食習慣就要作出改變。「始終個口做過手術，郁動無以前咁靈活，以前我不知幾叻食魚頭，而家唔敢，怕鯁骨。加上做手術時，醫生又拔咗我幾隻牙，所以而家食唔到硬嘅食物，花生、蠶豆，以後都無我份。」

專家解畫

中大醫學院耳鼻咽喉—頭頸外科學系名譽臨床副教授王維揚指出，本港每年大約有三百多宗口腔癌新症，口腔癌可以發生在口腔不同位置，包括嘴唇、舌頭、上顎、口腔底等，而劉婆婆則出現在臼齒後區。

由於口腔癌前期病變徵狀不明顯，往往只有輕微潰瘍或口腔內黏膜出現白斑，王維揚醫生就見過不少病人都誤以為自己只是「爛口」或生痱滋，不斷飲涼茶、吃龜苓膏，結果耽誤了病情，「如果係食嘢整損或者生痱滋，短則一、兩星期，長則三至四星期，一定會埋口，但口腔癌嘅潰瘍，係一直都唔會埋口嘅。」

大腿皮瓣修補傷口

雖然劉婆婆算醒目，及早發現，單靠手術切除已可解決癌患，但手術過程殊不簡單，王維揚醫生解釋︰「劉婆婆嘅腫瘤直徑大約有一點五厘米大，但我哋唔會淨係割走個瘤，為安全計，會大範圍咁割晒佢附近嘅組織，所以口腔傷口都幾大。於是，我哋要用劉婆婆大腿皮瓣（有血液供應的皮膚及皮下脂肪）嚟修補臼齒後區嘅傷口。」

講到尾，要預防口腔癌，最重要是戒煙酒！王維揚醫生說︰「醫學界相信，酒精、以及煙草嘅化學物質，會慢慢破壞口腔組織，增加患口腔癌嘅機會，所以煙酒都係少沾為妙。」

劉婆婆左下顎臼齒後區的癌細胞及附近一帶組織被切除後，再用大腿的

劇痛難當無法入睡

向來崇尚自然療法的Kennis，這次亦招架不住，要破例服食止痛藥，「最初以為用打坐冥想嘅方法可以止到痛，但原來當你痛到極點時，真係無辦法。我左邊面由腮位一直痛到去鼻竇位，再扯到上頭頂，我每次要打孖食兩粒止痛藥先止到痛，否則連瞓都瞓唔到。」

死忍兩天後，Kennis終向口腔頜面專科牙醫求診，證實是生牙瘡，醫生隨即替她的牙瘡放膿，並連隨拔掉左上顎的一隻大牙。自言已經非常注重口腔衞生的Kennis，對於生牙瘡，顯得一臉無奈，「三年前開始，我半年就洗牙一次；早晚刷牙之餘，亦用埋牙縫刷，再加漱口水；而餐與餐之間，又會用牙線清潔，兼用鹽水漱口，我自問都好乖啦，估唔到都係保唔住啲牙。」

專家解畫

港大牙醫學院口腔頜面外科名譽臨床教授張念光指出，牙瘡其實是口腔組織受細菌感染發炎而形成的一泡膿液，跟痱滋不同，痱滋大多生在口腔黏膜的位置，但牙瘡，卻是生長在牙齦附近。

他表示，造成牙瘡的原因有很多，包括牙根尖炎、牙周炎、骨髓炎等。而Kennis的牙瘡，則是由牙周炎所引致，「Kennis有慢性牙周病，牙床骨慢慢受侵蝕，形成牙周袋。因為牙周袋過深而病人好難自己清潔得到，牙菌膜會喺牙周袋內愈積愈多，當呢啲細菌變惡，牙齦邊緣會出現嚴重嘅發炎徵狀，甚至有膿液產生，形成急性牙周炎嘅牙瘡。」

牙瘡菌入血隨時奪命

咪以為生牙瘡是小事，嚴重起來，分分鐘攞命！張念光教授說︰「萬一牙瘡膿液經牙床骨或者牙肉蔓延到肌肉筋膜，再進入血液及流入體內，膿液嘅細菌就有機會擴散入胸腔、心臟包膜，如果無正確診斷，以及盡快治療，病人會有生命危險。」

他再三叮囑︰「所以，當出現牙肉腫痛、生瘡，甚至出現發燒、吞嚥唔順暢、呼吸困難等病徵，千祈唔好拖，應該第一時間搵口腔頜面外科醫生，或者去急症室求醫，等醫生替你放膿，必要時仲要剝埋導致生瘡嗰隻爛牙。」

爛口爛下體

兩年前，二十四歲的 John無緣無故狂生痱滋，每次多達四、五粒，令他痛不欲生，「幾乎每個月都生痱滋，阿媽話我熱氣，試過煲涼茶俾我飲，但都無乜幫助。」口腔生痱滋並不稀奇，但奇在 John連性器官都試過生痱滋，嚇得他以為自己患上性病，但驗血又證實他沒有「中招」。

「爛口」、「爛下體」的情況未解決，又輪到雙腳出事。一年前，John的小腿不時出紅疹，「啲紅疹好似『蚊赧』咁上下大，每次有四、五處會腫起，唔痕，但按落去就有啲痛。好奇怪，呢度出完、好番，但過幾日，又會喺小腿另一個位置出現。」John曾向家庭醫生求診，醫生雖發現其血液中的發炎指數很高，但始終未能斷症。

每次覆診醫生都會替John（右）檢查口腔，而在藥物控制下，他生痱滋的頻密程度已大減。

斷症貝塞特氏症

直至半年前，有三百多度近視的John突然出現飛蚊症，「飛蚊」在短短幾日內，已影響到其視力，John遂立即看眼科醫生。「醫生話我眼底血管發炎、出血，當佢知道我仲有生痱滋、出紅疹嘅病徵，就轉介我去睇風濕科。」

John在風濕科醫生檢查下，確診患上貝塞特氏症，經醫生處方免疫抑制劑及類固醇藥物後，病情已逐漸穩定下來，「雖然間唔中都有生痱滋，但就無之前咁頻密，亦唔會一次出四、五粒咁誇張，性器官亦再無潰瘍。」

專家解畫

養和醫院風濕病科中心主任李家榮醫生表示，貝塞特氏症其實是一種全身性的血管炎症，患者不論動脈、靜脈，大或小的血管，都可能受到攻擊。此病成因未明，但研究顯示，或與遺傳因子有關。

貝塞特氏症病人，每次出痱滋的數目往往有四、五粒，而且面積較大。

確診困難靠臨床病徵

他又指出，由於貝塞特氏症不能借助特定的抗體作輔助診斷，因此只能靠臨床病徵斷症，「首要睇病人有冇成日生痱滋，即係一年超過三次，而啲痱滋係又大又多嘅；另外，性器官有冇潰瘍？眼睛又冇發炎？皮膚有冇出現結節性紅斑？有時，我哋亦會用針刺去測試，因為有部分貝塞特氏症患者，皮膚會對針刺有反應，會出紅疹。」按國際診斷標準，只要病人有口腔潰瘍，再伴隨上述其中兩項病徵，便可確診患上貝塞特氏症。

病人有機會可停藥

李家榮醫生補充，貝塞特氏症屬於慢性病，治療方法取決於病情，「如果個病處於活躍期，醫生會視乎身體邊個地方受到攻擊而處方唔同嘅藥物，假如係口腔、性器官，可能會用相對溫和嘅消炎藥；但萬一係攻擊緊主要血管，又或者眼睛、腦部等重要器官時，就可能要處方生物製劑、類固醇或者一啲免疫調節藥物。」而當病情進入緩解期，病徵消失，病人甚至有機會停藥，僅接受醫生定期監察便可。

煙草含化學物質，會破壞口腔組織，同時減少唾液分泌，會增加患上各種口腔病的機會。

話你知

曾有國際大型研究發現，長期使用含酒精漱口水可增加患頭頸癌風險三倍，尤其是口腔癌。醫學界指出，漱口水並非清潔口腔的必需品，建議市民應先徵詢牙醫才使用。

生痱滋時，不少人都會在傷口上撒鹽殺菌。鹽的確有助殺菌，但濃度過高反而會令唾液減少，而唾液本身有殺菌及滋潤作用，因此生痱滋時，不妨以一茶匙鹽混合一杯溫水漱口，取代直接撒鹽。